李蘢怡（Tiffany）因與蕭定一終止合作鬧不快，對方以波大冇腦來批評她，令Tiffany嬲怒，昨日更向記者聲稱有人要對她不利，是非再起。蕭定一則建議她倘若真的被人恐嚇應去報警，並說：「亂講博宣傳對佢事業冇幫助！」
Tiffany昨日與廖碧兒獲邀擔任卡拉OK開幕剪綵嘉賓，Tiffany主動跟記者說：「之前有報道話我講蕭定一搞到我冇得撈，其實我都冇講過，阿一打過電話同我傾過，知道之後仲話大家都冇事，但後來又同記者講話我『波大冇腦』，記者話我波大冇腦就冇計，我波大唔大關佢咩事？我好嬲，人各有志，或者我真係唔夠李彩華咁有腦囉！有朋友同我講，話有人話如果我再亂講，就搵人搞我！」
咁冷血咁專一 問Tiffany可擔心被搞而去警署備案？Tiffany說不擔心，不考慮備案，至於李彩華是否真的比她有腦，Tiffany晦氣的說：「咁我諗係囉。（咁咪你大胸過李彩華？）呢人身攻擊，我唔知喇。（係咪因為你唔受溝呀？）冇咁事，佢咁專一！但我都欣賞佢咁冷血人，都會咁愛一個人。」
另一邊廂，蕭定一對Tiffany的言論冷靜的說：「如果真係有人恐嚇佢，我建議佢去報警囉，我絕對冇講過，我又唔係黑社會，我話講個波大冇腦，如果佢冇講過，咁佢咪唔係囉，冇講咪得囉。（佢話你冷血喎？）話我識得愛人又話我冷血，前後矛盾！（嬲唔嬲佢咁講？）唔嬲，有乜好嬲，不過叫佢唔好再用呢博宣傳啦，呢新聞幫唔到佢搵多做。」而李彩華則透過助手表示對事件不予置評。
採訪：專題小組
Tiffany多次被人以波大冇腦來形容，當然不開心。